Omukyala eyasoose okuwangula empaka z’emmotoka mu Uganda eza National Rally Susan Muwonge agambye nti ali mu bwetaavu bw’abamusaamu ensimbi nga bazitowa, bwaba wakwongera okunywerera mu muzannyo guno ogusingamu abasajja.

Oluvannyuma lw’okuwangula empaka z’ameefuga  era n’alangirirwa nga nnantameggwa w’eggwana mu muzannyoguno, nakazadde ono awagirwa kampuni ya Kobil, yategeezezza nti alubirira kuwangula ebinene okusinga ku kino. Yagaseeko nti abasajja bavuganya nabo balina obuwagizi bungi n’emmotoka zabwe nazo nnungi, nga kino kibawa enkizo ku ye.

Susan musanyufu olw’obuwanguzi n’etutumu lyeyafunye nga kati abantu nga 200 bebamukubidde ku ssimu okumuyozayoza n’okumusanyukirako.

Empaka z’ameefuga wezatandikira nga October 15, Muwonge yali akulembedde gw’asinga okuwakana naye Ponsiano Lwakataka n’obubonero 25, wabula Lwakataka yalemeddwa okumalako olwo Muwonge neyeriisa nkuuli ku beyasigadde nabo mu lwokaano.

Muwonge agambye nti yasanyukidde obuwagizi bw’abakyala abaabaddeyo mu bungi, wabula ng’asuubira okwewummuzaamu omwaka ogujja kubanga sizoni eno emuleseemu galya gokka.