Ng’amasomero gateekateeka okuggulawo olw’olusoma olusooka omwaka guno, abasomesa basazeewo kugumba ku ssomero lya Bat Valley Primary School okutuusa nga gavumenti ekoze ku nsonga zabwe.

Ebimu kubiruma abasomesa kwekubongeza ku musaala n’okubafunira ew’okusula nga bali ku mulimu.

Omubaka wa Kalungu west Joseph Sewungu, ategeezezza olukung’ana lw’abannamawulire nti  abasomesa tebajja kulabikako mu bibiina ku lusooka wabula okutuula ku Bat Valley okutuusa ng’ebizibu byabwe bigonjoddwa.

Agambye nti okwekalakaasa kuno bwekukolebwa mu lusoma olusooka kujja kuwonya okutaataganya ebibuuzo by’olusoma olusembayo ebiyisa abaana. Sewungu ategeezezza nti ekikulu mu byonna abasomesa baagala kusisinkana pulezidenti olwo bakakase nti ebizibu byabwe bifunye eky’okuddamu eky’enkomeredde.