Maama wa Buganda Nabagereka Sylvia Nagginda olunaku lw’eggulo yatongozza ekibiina omugenda okwegattiranga Abaana n’Abazukkulu bonna ab’ekika ky’omusu.

Omukolo guno gwabadde ku kasolya k’ekika ky’omusu akasangibwa ku kyalo Sama mu muluka gw’e Sama mu ggombolola lya Ssabasajja ery’e Kammengo mu ssaza ly’e Mawokota, ew’omukulu w’ekika ekyo omutaka Muyingo Bulega.

Mu nsinsikano eno ebeerawo buli mwaka ku luno Nabagereka yagguddewo n’ensawo y’ekika kino nga mu abazzukulu mwebagenda okuterekanga ensimbi ezinaakolanga emirimu gy’ekika, era nga jjajja wa Nabagereka omutaka Nkalubo Ssebuggwawo Nelson yeeyasoose okusaamu ejjamba.

Mu birala ebyatongozeddwa mulimu olusuku lw’ekika, embuga y’owakasolya n’enteekateeka ey’okusa ekika ku mutimbagano gw’ensi yonna oba yintaneti.