Enteekateeka za gavumenti ya Scotland ez’okukyusa mu mateeka ekkirize obufumbo bw’abantu b’ekikula ekimu etonzewo enkolagana etali yabulijjo. Ab’enzikiriza y’ekisiraamu wamu n’abakatoliki beegase balwanyise ekiteeso eky’okuyisa eteeka lino.

Abakulembeze b’enzikiriza zino mu Glasgow baludde nga basisinkana okuteesa ku ngeri y’okusimbira ekkuuli ekintu kyebalaba nga kya ntiisa eri ekkula ly’obufumbo. Ng’ojjeko enjawukana eziri wakati wabwe kino bakiraba nga nsonga eyetagisa okuba obumu.

Omwogezi wa Glasgow Central Mosque, Bashir Maan yagambye nti bakolaganira wamu n’abakatoliki kubanga ebirowoozo byabwe bifaanana ku nsonga eno.

Yakikatirizza nti bwekituuka ku kulwanirira obufumbo mu Scotland, bajja kukolagana na buli muntu, omuli abantu ssekinoomu oba enzikiriza n’ebibiina eby’enjawulo, ebinewaayo okulwanirira kki obufumbo kyekitegeeza- omusajja omu n’omukazi omu.