Ba minisita ba gavumenti bana bamegeddwa mu kulonda kw’ekibiina kya NRM okw’okusunsulamu abanetaba mu kulonda okw’omwaka ogujja.

Ebyavudde mu kulonda biraga nti  Janat Namuyangu, Simon Ejua, Simon D’ujanga ne Dr. Emmanuel Otaala basuliddwa ettale ababavuganyiza.

Namuyangu, ye minisita omubeezi ow’ebyamazzi era nga y’akyikirira abakyala mu palamenti okuva e Pallisa. Yabadde yesimbyewo akyikirire Kibuku constituency, naye yamegeddwa abaddeyo Saleh Kamba mu kulonda okwajudde efujjo n’emivuyo. Kamba yafunye obululu 21,539 ate ye Namuyangu nakunganya yo  5,738.

Mubarak Kalungi nga yavunanyizibwa mu kulonda okwo yategezezza nti Namuyangu yamukubira essimu ku Bbalaza nga agamba nti ayagala kuva mu kibiina yesimbewo kubwanamunigina.

Ate mu ssaza ly’e Vurra  mu Arua district, minisita w’entambula Simon Ejua yawanguddwa Dr. Sam Okuonzi.
Y’avunanyizibwa ku by’emirimu Dr. Emmanuel Otaala yamegeddwa eyakabiyingira, Jacob Oboth Oboth.  

Mu bituntu ebirala, minisita w’eby’okwerinda Amama Mbabazi (Kinkiizi West), minisita w’abakozi ba gavumenti Seezi Mbaguta (Rukungiri), eyali minisita w’ebyobulamu Maj. Gen. Jim Muhwezi (Rujumbura) n’eyali minisita omubeezi ow’ebyobulamu Capt. Mike Mukula (Soroti Municipality) bakaliide.
Mu Amuru disitulikiti, eyali minisita w’obukiika konno bwa Uganda Betty Bigombe yakubidde waggulu ku kuvuganya kuky’okukikirira abakyala mu disitulikiti eyo. Namirembe Bitamazire naye yayisemu avuganye nga ow’bakyala mu Butambala.

Mu disitukiti y’Oyam akyikirira abakyala Beatrice Lagada, yeddiza ekifo bweyawangudde ate eyesimbye mu  Oyam North Savior Ogena n’awangula Francis Onena.