Bannamateeka abalumirirwa ensonga za Buganda  bawadde gavumenti ennaku 7 eyasanguze lipoota y’akakiiko akaabuuliriza ku kwokya Amasiro, bw’eremwa bagitwala mu kkooti.

Bannamateeka bano abeegattira mu kibiina kya Young Catholic Lawyers for Political Correctness ekikulirwa munnamateeka Jude Mbabaali be bategeezezza bino ku Christ the King mu Kampala ku Mmande.

Mbabaali ng’ali ne Richard Lumu baategeezezza nti lipoota y’akakiiko yalina okuwa ebyava ku kunoonyereza bannayuganda babimanye naye ku kiseera kino gavumenti yagituulako n’etategeeza bantu kiki ekyazuulibwa so nga bwe boogerako n’abamu ku baali ku kakiiko babasunirako nti akakiiko kazuula abaayokya n’abaakuba abantu amasasi.

Ku ntandikwa y’omwaka gwa 2011 akakiiko akaakulirwa Omulamuzi wa kkooti enkulu George Engwau kaafundikira okubuulirira ku by'Amasiro era eyali omuwandiisi waako Florence Sewannyana n’atutegeeza nti lipoota baagimaliriza ne bagiwa gavumenti mu budde.

“Tuwadde gavumenti ennaku 7 ebuulire bannayuganda ebiri mu lipoota akakiiko bye kazuula bw’eremwa tugitwala mu kkooti kubanga lipoota teyali ya kyama” Mbabaali bwe yakkaatirizza.

Katikkiro wa Buganda Ying. John Baptist Walusimbi bwe yabadde ayogera mu Lukiiko lwa Buganda mu December omwaka oguwedde yategeezezza nti emirimu agikoze n’agimaliriza naye agenze si mumativu kubanga tategedde byava mu lipooti y’akakiiko akabuuliriza ku kyavaako okwokya Amasiro.

Amasiro ga Bassekabaka ba Buganda e Kasubi gakwata omuliro nga 16/March/2010 ennyumba Muzibwazaalampanga omugalamidde enjole za Bassekabaka bana n’esaanawo.