Yunivasite y’e Makerere etegeezezza nti egenda kwongeza abasomesa baayo omusaala kikendeeze ku bwediimo n’okutumbula ebyensoma.

Omumyuka wa Cansala wa yunuvasite eno, Polof. Venansius  Byamureeba abadde aggulawo amatikkira ag’omulundi ogwa  62, eggulo yategeezezza nti baagala bapolofeesa bafune 8,000,000/- okuva ku 3,000,000/- ze baabaddeko kati n’agamba nti bataddewo akakiiko k’abakugu okukituukiriza.

Akakiiko kano akaateekeddwawo nga November 18, 2011  kakulirwa  Polof. Francis Omaswa ng’ono ye Cansala wa Busitema University. Bammemba abalala be ba  Polof. Foster Byarugaba  omumyuka wa ssentebe w’olukiiko lwa  Kampala International University, Polof. Ben Kiregyeya ne Dr. Patrick Mangeni .

Kyokka Byamureeba yategeezezza nti Makerere erina bapolofeesa  74 n’abamyuka baabwe (Associate Polofeesa)  150.

Ku mukolo guno abamu ku bayizi 11,022 abagenda okutikkirwa wiiki eno yonna baweereddwa diguli zaabwe. Ku bayizi bano, 5,873 (53.3%) balenzi ate abasigadde bawala.

Ku batikkiddwa abayizi  221 bokka be bayitidde mu ddaala erisooka (first class degree).
Abayizi abafunye diguli ezookusatu baabadde 42 era nga be bakyasinze okubeera abangi bukya yunivasite etandikibwawo. Omuyizi eyanywedde mu banne bonna akende ye  Tonny Ongin enzaalwa ye Teso.