Pulezidenti Yoweri Museveni awadde Pulezidenti Paul Kagame owa Rwanda emidaali gy’obuzira esatu, n’ategeeza nti Uganda ne Rwanda ziringa ensi emu era bw’abeera e Rwanda abeera ng’ali mu Uganda.

Mw. Museveni yategeezezza nti awulira ekintu kye kimu bw’abeera mu mawanga ag’omuliraano amalala nga Kenya, Tanzania, Burundi, DR Congo ne South Sudan.

“Njagala Abanywanda bonna bwe baba mu Uganda beegazaanye ng’abali ewaabwe era ne Bannakenya, Abatanzania, Abarundi, Abacongo n’aba South Sudan bwe batyo,” Museveni bwe yaggumizza.

Bino byabadde ku Sebei College mu disitulikiti y’e Kapchorwa ku mikolo gy’okujjukira ameenunula aga 26 January.

Pulezidenti Kagame yaweereddwa omudaali ogwa “Uganda Ekkula lya Afirika,” oguweebwa abakulembeze b’amawanga ne gavumenti. Yayongeddwaako ogwa Kagera oguweebwa abeetaba mu lutalo olwasiguukulula Idi Amin mu 1979, n’ogwa Luweero oguweebwa abeetaba mu lutalo lw’omu nsiko olwalwanyisa effugabbi lya Obote ll.

Pulezidenti Kagame yasiimye nnyo emidaali egyamuweereddwa ne yeebaza Bannayuganda okubeera obumu n’Abanyarwanda mu bubi ne mu bulungi era n’alabula nti bo bennyini be balina okweggya mu bwavu mu kifo ky’okulowooleza mu banunuzi ne mu buyambi okuva eri abaabanunula.